Entrega de premios "As imaxes do patrimonio"

 O venres día 15 de novembro, un grupo de alumnos e alumnas do noso instituto acompañou a Iago Varela, membro do EDLG e gañador dun accésit na VII Edición do Certame "As imaxes do patrimonio" organizado por Ponte... nas ondas!

A participación foi feita na categoría de podcast, o podcast premiado pódese escoitar aquí. Ademais, podedes consultar o resto dos premiados nesta publicación e ver todas as fotos do certame aquí.

A gala do día 15 de novembro, que se celebrou no Auditorio do Centro Veciñal e Cultural de Valadares en Vigo, déixanos imaxes da participación do noso alumnado que vos deixamos agora no blogue para ter unha pequena idea de como foi o día.

Parabéns a Iago Varela!

Chegou o Samaín á radio!

 Pois xa temos o primeiro programa do curso, Aldara, Uxía e Lara, de 2º da ESO, ofrécennos neste primeiro episodio do seu programa "Falando coa lúa" un interesante percorrido pola tradición do Samaín, pola súa historia e as características da súa tradición. Non perdades o programa!

Día das escritoras

O día 18 de outubro conmemoramos no centro e, en coordinación coa biblioteca, o Día das Escritoras. Como podedes imaxinar, a mellor maneira de conmemorar ás escritoras é léndoas. Por iso, nos dous recreos do venres, xuntámonos na biblioteca a ler autoras. Alumnado e profesorado escolleu textos das súas escritoras favoritas e lemos fragmentos de obras de escritoras galegas, portuguesas, brasileiras, sãotomenses, francesas, españolas e inglesas. Ao final, a actividade mostrou a grande diversidade de textos aos que podemos acceder lendo escritoras. 

Calendario do primeiro trimestre

 E como non, tamén temos o calendario do primeiro trimestre que xa está en todas as clases...

O galego en redes

 

Seguimos coas actividades, nesta ocasión tivemos unha charla-obradoiro a cargo de Borxa, o creador da comunidade "Orgullo galego" que nos trouxo ao centro moita información sobre a presenza do galego nas redes, ademais de animarnos a ser nós tamén creadoras de contidos en galego. 

A charla foi organizada polo concello de Ames a través do Servizo de Normalización do concello e da concellaría de Mocidade. Tamén aproveitamos para animar o alumnado a participar no V Certame de Galetiktokers.

Comezamos o curso 24-25

 

Este curso 24-25 comezou forte, un grupo amplo de rapazada está xa moi activo no EDLG do noso IES fazendo programas de radio e participando nas actividades. Unha das primeiras actividades que programas é a do "Voluntariado lingüístico" que consiste, nin máis nin menos, que en falar! Xuntamos rapaces e rapazas galegofalantes con alumnado novo que chegou doutros países ou doutros lugares de España para que se coñezan e aprendan a nosa lingua. Poñemos así en funcionamento os recreos con lingua, eses recreos serán sempre os xoves, no primeiro recreo, onde a rapazada se xunta no punto de encontro cos seus carnés de voluntarios e voluntarias e a falar! E como non podería ser menos, a participación ten premio. Se chegan aos 8 recreos con lingua, terán dereito a un vale para unha consumición na cafetería. Estás a tempo de anotarte aos recreos con lingua, só tés que escribirnos ao correo electrónico do equipo: endlmilladoiro@gmail.com ou aparecer os xoves no primeiro recreo no punto de encontro, na entrada do centro.

Calendario de aula 3º trimestre